أحداث خطف الجنود المصريين بسيناء

ممكن تخيل مقطع للسادات بهذا الشأن ... بس استحضروا السادات وهو بيتكلم 

أنا حابب بس فى اللحظة دى أقول حاجة لولادنا المصريين من بدو سينا اللى خطفوا اولادهم واخواتهم المصريين اللى زيهم 
انا مندهش .. فعلا مندهش
هى دى اخلاق البدو ... عيب .. عييييب ... بقولها وبعلى صوتي عيييب ... احنا ولاد وطن واحد وعدونا واحد ... عيب الكلام ده يطلع ويبقى كده على الملأ ... الغرب يقول علينا اية هااا .. اسرائيل تقول علينا اية .. مش قادرين نتحكم فى ارضنا وفى حدودنا ... لا ... لا يا بدو سينا لا
انا اعرف عن بدو سينا ومشايخهم كل خير .. الرجالة ولاد البلد اللى وقفوا فى حروب مصر زي الأسود .. يقوموا يجوا النهاردة يعملوا حركات العيال دى ... والله حاجة تكسف
بكره ان شاء الله الولاد يكونوا عندي ... وان ليكوا حق تخدوه ملكوش يبقى خلاص ... البلد مش فوضى .. مش عزبة ولا تكية ولا فتونة هي ... عيب ميصحش الكلام ده
وده اللى عندي وانا واثق من بدو سينا الرجالة انهم هيبقوا اد المسئولية ... وإلا هما عارفين كويس اوى الجيش ممكن يعمل اية باشارة واحدة من ايدي .. ومثال جثة يوسف السباعي ليس ببعيد .. ولو مش فاكرين او مش عاوزين تفتكروا انا بفكركوا ... رجعوا الولاد واللى له حاجة يخدها ... والسلام عليكم ورحمة الله وبركاته

بتاريخ 20/5/2013 

انقطاع الكهرباء

المتأمل فى نظرية قطع الكهرباء بمعدلات خرافية يوميا للدرجة التى سنشكى بعد ذلك ان النور بيجي من كتر ما هنتعود على الظلام .. سيجد ان هذا دفعني لمعرفة تاريخ الكهرباء ومن تحديداً مكتشف الكهرباء والموضوع طلع قديم من ايام القدماء المصريين و مطلعش اول واحد اكتشف الكهرباء لا فولتا ولا فارداي ولا اديسون ولا الشباب دول مع انهم ليهم اختراعاتهم .. بس اول واحد اكتشف الكهرباء هو طبيب انجليزي اسمه ويليام جيلبرت .. شوف ازاى يا اخي 

وحاجة تانية انا كنت مفتقدها بشدة فى ظل الحياة المادية السريعة المتلاحقة الفيسبوكية الادمانية .. ان الواحد بيلاقى فرصة للتأمل والنظر للسماء و النجوم تتلألأ بها كصفحة ماء صفي في ظلمة ليلة قاتمة يتلاعب بموجاتها ضوء القمر المبهر الحزين الشجي مما يجعلك ترتمي بنفسك إلى خيالك وتتعمق وتغوص لتعلو بأجمل القصص والروايات والخيالات والتأملات

حقا ما أروع تلك الأجواء التي اعشقها وبخاصة إذا كانت في ليلة باردة ساكنة هادئة تداعبها الأمطار من حين لآخر لتعطي بذلك لمسة من الموسيقى التصويرية لذلك المشهد الذي لا يقدره إلا كل ذو مرهف بالجمال متذوق لعظمة الخالق

بتاريخ 20/5/2013

هل من عودة

لا يجب أن نلتفت كثيراً لخطابات السيد الرئيس و لا نغضب أيضاً لأن هذه الخطابات موجهة إلى أنصار الرئيس ومؤيديه وليست إلى جموع الشعب المصري التي ضاق بها الحال ، حيث تأتي كلامات السيد الرئيس الملهمة والمثبتة لثقة أنصاره التي ربما تتأثر من وقت للآخر بالرأي العام وبضميرها ويتسرب إليهم بعض من الشك وقلة الثقة والهزة تجاه السيد الرئيس والجماعة الحاكمة ويحتاجون من وقت للآخر مثل هذه الخطابات لتريح بالهم وتثلج صدورهم بالوهم وتبعث إليهم باليقين وتعيد إليهم الثقة وتثبتهم على الحق الباطل ... فمثل هذه الكلمات تمنع الارتداد وتحافظ على الثلة الباقية من مؤيدي الرئيس 

لذلك يا أحباب غضوا الطرف عن كلمات الرئيس ولا تلقوا لها بالاً واتركوه يغرد واهو بيفضفض برده وميرضيكوش يعني الريس ميفضفضش 

أقول لسيادة الرئيس : وإن كنت تعزف أروع الألحان وتنظم أجمل الأبيات فهي تكون شاذة نشاذ إذا خرجت عن الأوركسترا ولفظها الجميع ... فهل من متدبر !!